Dünyanın 3 milyondan çox internet-saytı üzrə istifadəçilərin sayını izləyən StatCounter servisinin məlumatına görə, Google Chrome dünyanın ən populyar brauzeri hesab edilib. Microsoft Internet Explorer (IE) brauzerini qabaqlayan Chrome populyarlığına görə ilk dəfə olaraq bütün həftə ərzində birinci yerdə qərar tuta bilib. StatCounter-in rəqəmlərinə əsasən, mayın 14-dən 20-dək Chrome-un payı 32,76 faiz, onun yaxın izləyicisi Internet Explorer-in 31,94 faiz təşkil edib. Üçüncü yerdə qərarlaşan Mozilla Firefox brauzeri həmin dövrdə 25,47 faizlik nəticə əldə edib, Apple Safari dördüncü yeri (7,08%), Opera isə beşinci yeri (1,74%) tutub. RİA Novosti qeyd edir ki, statistik servislərin məlumatlarını birmənalı qəbul etmək lazım deyil. Məsələn, Net Marketshare və NetApplications servislərinin hesablamalarına əsasən, Internet Explorer və Firefox hələ də Chrome-u qabaqlayır.